A primeira semana de clases
O pasado
luns 12 de setembro comezaba un novo curso, un gran cambio para os nosos
aventureiros e aventureiras, pois deixaban atrás a etapa de infantil para
comezar a etapa de primaria, un gran cambio sen lugar a dúbida.
Nesta primeira
semana fixemos moitas cousas, como aprender as rutinas diarias, fixar as normas
de clase e converter a nosa aula nun espazo propio, con personalidade
relacionado co eixe vertebrador do centro: OS RÍOS.
Cales son as nosas rutinas? Dende que chegamos ó cole ata
que marchamos, estamos facendo rutinas. A principal, é deixar a clase tal e
como a atopamos, é dicir, ordenada e limpa.
Todos os días, cando
chegamos ó cole, despedímonos das nosas familias e colocámonos en fila pegados
á parede para subir coa mestra á clase. Ó chegar á aula, o primeiro da fila acende
as luces e os demais diríxense ó seu sitio para dar a volta á súa cadeira e
poder colocar a súa mochila. A continuación, van ó colgadoiro co seu nome para deixar
as chaquetas e volven á clase para comezar a xornada escolar, coa repetición
das normas de clase.
Pero, cales son normas de clase?
- Escoitar ós compañeiros
e á mestra cando falan.
- Preguntar as dúbidas
que teño.
- Traballar en silencio.
- Levantar a man para
falar.
- Coidar e recoller o
material.
- Ir á outras clases en
orde e en silencio.
A partir da próxima
semana, cada grupo encargarase de comprobar se se cumpre unha norma ou non de
maneira diaria.
Unha vez establecidas as
normas, comezamos a traballar para converter a aula nun espazo propio. Para isto, fixemos os nomes decorados cun
peixe para colocar no colgadoiro, xa que estamos nun río. Tamén eliximos un
peixe para representar a cada grupo e fixemos un debuxo deste animal. Despois
decoramos a porta da clase cun mural cos peixes de cada un dos membros dos
grupos, tal e como se pode ver na imaxe.
Pero non todo ía ser
decorar, tamén vimos que cousas e que letras sabiamos ler e escribir, e que nos
lembrabamos dos números. Ademais, practicamos a expresión oral, contando unha
historia sobre o debuxo que fixemos, e a comprensión oral, ó responder ás
preguntas sobre o que escoitaron. Finalmente, descubrimos o que se vai
traballar nas novas materias de naturais e sociais.
Isto é todo, polo
momento. Agora que xa nos coñecemos e sabemos como hai que estar na clase para
poder traballar, esta semana descubriremos moitas cousas, pois comeza a
aventura do coñecemento, e quizais con algunha sorpresa.
